රී ලංකාව තුල සංවේදී ගැටළු සඳහා වෘත්තීමය උපදේශකවරුන්ගෙන් උපදෙස් ලබාගැනීම යනු මේ මොහොත වන විටත් නොසළකා හරින, පහත් කොට සළකන හා සමාජයෙන් ගර්හාවට ලක් කරන කාරණාවයි . එය ඔබේ විවාහ ජීවිතය ගැන සම්බන්ධ කරුණක් වේවා, ආදර ජීවිතයෙහි අඬදබර වේවා, රැකියාවේ ඇති ආතතිය ගැන වේවා, මානසික පීඩනය සම්බන්ධ දෙයක් වේවා, මේ කුමන කරුණක් සඳහා උපදේශන සේවාවක් ලබාගත්තා වුණත් තවමත් අප රට තුල එය සැළකෙන්නේ බියසුළු, අගෞරව කළයුතු දෙයක් ලෙසයි . මෙලෙස උපදේශන වෙත යොමුවන අය හට එල්ල කරන අපහාස නිසාම, ශ්‍රී ලංකාවේ බොහෝ පිරිසක් සිය මානසික සෞඛ්‍යය ගැන අවධානය යොමු කිරීම මගහැර ඇත.
මෙම තෙරපි, එසේත් නැතිනම් චිකිත්සා වෙත සමාජයෙන් එල්ල වෙන ගර්හාවන් නිසාම, එම චිකිත්සාවන් වටා විශාල වශයෙන් දුර්මත හා මිත්‍යා මත ගොඩ නැගී ඇත. අප පැමිණ සිටින්නේ එම මිත්‍යාවන් විනාශ කොට, සත්‍ය තොරතුරු ඔබ හමුවේ දිගහැරීමටයි!
1. “චිකිත්සාවන් ඇත්තේ ‘පිස්සන්’ සඳහා හෝ මානසික රෝගයක් ඇති අයට ප්‍රතිකාර කිරීම සඳහා පමණක් වේ.”
කිසිසේත්ම සත්‍යය නොවේ. චිකිත්සාවක් සඳහා යන පුද්ගලයෙකු මුහුණ දෙන්නේත්, අප සැවොම එදිනෙදා ජීවිතයේ මුහුණ දෙන තමන් ගැන තමන් තුල ඇති විශ්වාසය සහ අවිශ්වාසය, රැකියාවෙහි ඇති පීඩනය, විවාහ ජීවිතයේ ගැටළු, සාමාන්‍ය ජීවිතය තුල ඇති වන වෙනස් වීම්, තනිකම, මානසික පීඩනය සහ සාංකාව වැනි අභියෝග වලටම වේ. වෙනස නම් චිකිත්සාවක් වෙත යන පුද්ගලයා හට එම අභියෝග සමග සටන් කිරීම පහසු වීමයි. එනම් චිකිත්සාවක් යනු හුදෙක් ප්‍රතිකාරයකට එහා ගිය ජීවිතය වඩාත් යහපත් කරගැනීම සඳහා සහය වන මාර්ගයක් වේ.
ඔබේ චිකිත්සකවරයා විසින් ඔබට පීඩනකාරී අවස්ථා වලට මුහුණ දීමට හා ඒවා හොඳින් පාලනය කරගැනීමට අවශ්‍ය යාන්ත්‍රණය ගොඩනැගීමට සහය වනු ඇත. ඒ හරහා ඔබට වඩාත් ඵලදායි හා සතුටුදායක දිවියක් ගෙවීමට හැකිවනු ඇත.
2. “චිකිත්සාවක් වෙත යෑම දුර්වල ක්‍රියාවකි.”
සත්‍ය නොවේ. අප සංස්කෘතිය තුල අපේ ප්‍රශ්න අපම විසඳාගත යුතු යැයි මතයක් පවතී. ඒ අනුව ප්‍රශ්නයකදි අන් අයෙකුගේ සහය පතන අයව අප සමාජය විසින් දුර්වලයන් ලෙස හංවඩු ගසයි. නමුත් යථාර්ථය නම්, අප සිටින්නේ හොඳින් නොවන බව හා අපට යම් ගැටලුවක් ඇති බව හඳුනාගැනීමත්, ඒ සඳහා සහය පැතීමත් යනු අපේ ධෛර්යය හා ශක්තිය පිළිඹිබු කරන ක්‍රියාවන් වේ. අපට උණක්, හෙම්බිරිස්සාවක් සෑදුණු විට, අපේ අස්ථියක් බිදුණු විට හෝ සම මත කුරුලෑවක් පැමිණි විට අප එය අපේ දුර්වලතාවයක් ලෙස සළකන්නේවත්, ඒවාට ප්‍රතිකාර ලබාගැනීම පරාජයක් ලෙස ගන්නේවත් නැහැ. අපේ මානසික සෞඛ්‍යයත් ඒ හා සමාන ඉතා සාමාන්‍ය දෙයකි. අප පීඩාවට පත් කරන ආතතිය, සාංකාව, ඇබ්බැහියන් හෝ වෙනත් එවැනි බාධාවන් ඉවත් කිරීමට සහාය පැතීම අතිශයින්ම සාමාන්‍ය වේ.
3. “වෛද්‍යවරුන් විසින් ‘පිස්සු පෙත්තක්’ ලියා දෙයි.”
අතිශයින්ම අසත්‍ය කරුණකි. චිකිත්සාවන් බහුතරයක් ආරම්භ වන්නේ සංවාද ලෙසින් ය. සාමාන්‍යයෙන් ඔබේ ප්‍රාථමික ප්‍රතිකාර ක්‍රමය ලෙස ඔවුන් කරන්නේ ඔබත් සමග හොඳින් කතා කිරීමයි. නමුත් ඔබේ ගැටළුවට ගැළපෙන පරිදි සමහර අවස්ථා වල පමණක් ඔබේ වෛද්‍යවරයා විසින් ඔබට ඖෂධ නිර්දේශ කරනු ඇත. එම ඖෂධ ඔබව වඩාත් සෞඛ්‍යය සම්පන්න අයෙක් බවට පත් කිරීමට සහය වනු ඇත. උදාහරණයක් ලෙස වෛද්‍යවරයකු විසින් මානසික පීඩනයෙහි මූලික ලක්ෂණ නිර්ණය කොට, එය කෙටිකාලීන එකක් වනු ඇති බවට විශ්වාස කරයි නම්, ඔහු ඒ සඳහා මානසික පීඩනය සඳහා වූ ඖෂධ නිර්දේශ නොකොට, කවුන්සිලින්, ජීවන විලාසිතාව වෙනස් කිරීම වැනි අනෙකුත් විධි වලින් ප්‍රතිකාර කිරීම වෙත අවධානය යොමු කරනු ඇත.
සංවාද චිකිත්සා සහ භාවනාව යන දෙකම මානසික සුවය ළඟා කරගැනීම සඳහා ඇති ඵලදායි ප්‍රතිකාර ක්‍රමයන් වේ. ඔබේ රෝග ලක්ෂණ, රෝග ලක්ෂණ වල සංකීර්ණතාව, ඔබේ පෙර අත්දැකීම් වැනි දෑ සළකමින් ඔබේ මානසික සුවය නැවත ඔබ වෙත ළඟා කරගැනීම සඳහා අවශ්‍ය ප්‍රතිකාර ක්‍රමය කුමක්ද යන්න පිළිබඳව ඔබ හා ඔබේ වෛද්‍යවරයා යන දෙදෙනාටම එකතු වී තීරණය කළ හැකිය.
4. “මට කතා කිරීම සඳහා මගේ පවුලේ අය සහ යහලුවන් සිටී, එබැවින් මට චිකිත්සකවරයකුගේ සහය අවශ්‍ය නැහැ”
පවුලේ සාමාජිකයන් සහ යහලුවන් සමග ශක්තිමත් සබඳතාවක් පැවතීම ඔබේ මානසික සුවතාවට මග කියන සාධකයක් වුවත්, සමහරක් සුවිශේෂී සංවේදි කරුණු එසේ යහලුවන්ට හෝ පවුලේ අයවලුන් හට විසඳිය හැකි ඒවා නොවේ. ඔබේ ආදරණීයන් හට ඔබේ ගැටළු පවසනවාට වඩා වෘත්තීමය උපදේශකවරයකු හට ඒවා පැවසීම අතර විශාල වෙනසක් තිබේ. වෘත්තීමය උපදේශකවරයකු යනු ඒ වෙනුවෙන්ම පුහුණු වූ, ඒ පිළිබඳව හොඳ අවබෝධයක් ඇති, එවැනි ගැටළු විසඳීමට හැකි සහ ඔබේ යහ පැවැත්ම සඳහා අපක්ෂපාතී උපදේශන හා මාර්ගෝපදේශන ලබා දෙන අය වේ.
5. “ඔබ කාලයට ඉඩ දී බලා සිටියහොත්, සියල්ල හොඳින් සිදුවනු ඇත.”
අප හට සිත තුල වේදනාවක් ඇති වූ විට, එය ඉබේම පහව ගොස් අප යළිත් ඉබේම යථා තත්වයට පැමිණෙනු ඇතැයි යන විශ්වාසයෙන් යුතුව අපේ එදිනෙදා ජීවිතයේ වැඩ වල නිරත වීමට අප උත්සාහ කරයි. නමුත් සත්‍ය නම් දතේ කැක්කුමකට ප්‍රමාද වී ප්‍රතිකාර කිරීමට වඩා කලින්ම දන්ත වෛද්‍යවරයකු හමුවට යෑම හොඳ වෙන්නේ යම් සේද, පපුවේ අමාරුවක් සඳහා පුලුවන් ඉක්මණින් හෘද රෝග විශේෂඥ වෛද්‍යවරයකු හමුවට යන්නේ යම් සේද, එසේම මනසේ ඇති කම්පන සඳහා ද ඉක්මණින්ම වෛද්‍ය සහය පැතිය යුතු වේ. එවිට එයට කවුන්සිලින් හරහා හෝ අවශ්‍ය නම් ඖෂධ නිර්දේශ කිරීමෙන් හෝ ඔබේ මානසික සුවය, යළිත් ඔබ වෙත රැගෙන එනු ඇත.
ඔබේ මානසික සුවය වෙනුවෙන් වෘත්තීමය උපදේශකවරුන්ගේ සහය පැතීම නිර්භීත ක්‍රියාවකි. එය ඔබේ මානසික සුවය වෙනුවෙන් ඔබ තබන පළමු පියවරයි. oDoc විසින් ඔබට මනෝ චිකිත්සකවරුන්, මනෝ වෛද්‍යවරුන් හෝ මනෝ උපදේශකවරුන් සමග ඔබේ සිතැඟි නිදහසේ පැවසීමට අවශ්‍ය සුරක්ෂිත මාර්ගයක් සකසා දී ඇත. ඔබට oDoc ඇප් එක හරහා ඔබේ සිතුවිලි කිසිදු සැකයකින් තොරව ඔවුන්ට පැවසිය හැකිය. ඊට අමතරව ඔබට oMind මාසික පැකේජයේ ග්‍රාහකයකු බවට පත්වීම මගින් වෘත්තීමය උපදේශකවරුන් සමග අසීමිත ලෙස සම්බන්ධ වීමේ හැකියාව ලබාගත හැකිය. එවිට නිතරම ඔබ වෙනුවෙන්, ඔබේ පසෙකින් වෛද්‍යවරයකු සිටිනු ඇත.
References:
Understanding Borderline Personality Disorder: Symptoms, Causes, and Treatment. Borderline Personality Disorder (BPD) is a mental health disorder characterised by instability in mood, behaviour, and relationships.
Panic Attack vs. Anxiety Attack: Everything you need to know. Anxiety and panic attacks are mental health conditions that can cause significant distress and interfere
Everyone feels the blues at several points in their life. In fact, feeling sad is a normal human reaction. At the same time, it’s normal
නවතම සෞඛ්‍යය උපදෙස් එසැණින් ඔබ වෙත ලබා ගන්න